Deflimpiya Komitəsi və Azərbaycan Atıcılıq Federasiyası arasında Memorandum imzalanıb
2024-cü il 22 avqust tarixində Azərbaycan Respublikası Deflimpiya Komitəsi və Azərbaycan Atıcılıq Federasiyası arasında Əməkdaşlıq haqqında Anlaşma Memorandumu imzalanıb. Görüşdə Deflimpiya Komitəsi tərəfindən baş katib Namiq Novruzov, idarə heyətinin üzvü Sahib Gülməmmədov və idman şöbəsinin əməkdaşı Asxab Kalayev, Azərbaycan Atıcılıq Federasiyası tərəfindən isə federasiyanın vitse-prezidenti Zemfira Meftaxetdinova, vitse-prezident Tofiq Bəylərov, baş katib Emin Cəfərov, baş məşqçi İradə Aşumova və mətbuat katibi Günel Salayeva iştirak etmişdirlər. Deflimpiya Komitəsinin baş katibi Namiq Novruzov çıxışında beynəlxalq deflimpiya hərəkatı və Beynəlxalq Karlar İdman Komitəsi barədə ümumi məlumatı təqdim edib. Eyni zamanda, Azərbaycan Deflimpiya Komitəsinin eşitmə məhdudiyyətli şəxslərin idmana cəlb olunmasının kütləviliyinin təmin edilməsinin, onların idman vasitəsi ilə sosial həyata inteqrasiya etməklərinin dəstəklənməsi istiqamətində görülən işlər və planlar barəsində məlumat verərək Atıcılıq Federasiyası ilə də qarşılıqlı əməkdaşlığın gələcəkdə yeni uğurlara təməlini qoyacağına inandığını bildirib. Bununla əlaqədar keçirilən görüşdə çıxış edən AAF-ın vitse-prezidenti Zemfira Meftaxetdinova bildirib ki, tərəflər arasında əməkdaşlıq inklüziv idmanın inkişafı istiqamətində mühüm addımdır. Həmçinin, Zemfira xanım qeyd edib ki, imzalanan Memorandum mövcud əməkdaşlığın genişləndirilməsinə, idman əlaqələrinin bundan sonra daha da inkişaf etdirilməsinə əlavə imkanlar açır. Daha sonra baş katib Emin Cəfərov çıxış edərək, Federasiya tərəfindən eşitmə məhdudiyyətli şəxslərin atıcılığın hər iki növünə cəlb edilməsi, Bakı Atıcılıq Mərkəzində keçirilən təlim-məşqlərdə, bir çox aktiv fəaliyyətlərdə iştirak etməsi, peşəkar müəllimlər tərəfindən xüsusi dərslərin keçirilməsi və onların yarışlara hazırlığı zamanı lazım olan avadanlıqların və infrastrukturların təmin edilməsi üçün hər cür şəraitin yaradılacağını vurğulayıb. AAF-ın vitse-prezidenti Tofiq Bəylərov isə bildirib ki, birgə əməkdaşlıq çərçivəsində atıcılıq idman növünə marağı və bacarığı olan eşitmə məhdudiyyətli şəxslərin cəlb edilməsi məqsədilə müxtəlif məktəb və tədris mərkəzlərində infosessiyalar, məlumatlandırma kampaniyaları təşkil ediləcək. Memoranduma əsasən hər iki qurum ölkədə deflimpiya hərəkatının inkişafı, eşitmə məhdudiyyətli şəxslərin idmana cəlb edilməsi və bu istiqamətdə inkişafın təmin edilməsi üçün birgə təkliflərin işlənib hazırlanması, görüşlərin, layihələrin, maarifləndirici işlərin həyata keçirilməsi kimi sahələrdə qarşılıqlı fəaliyyət göstərəcəklər.
Daha ətraflı
